Turmush — Жалал-Абад облусунда жыл башынан бери 88 өрт кырсыгы катталып, 2 киши каза болду. Мындай маалыматты ӨКМдин Жалал-Абад облусундагы башкармалыгынан билдиришти.
Маалым болгондой, ушул тапта куткаруучулар жарандар арасында түшүндүрүү иштерин алып барып жатышат.
«2026-жылдын ушул күнүнө карата облус аймагында 88 өрт кырсыгы катталып, анын кесепетинен 20 миллион сомдон ашуун материалдык чыгым келтирилген. Тилекке каршы, өрт кырсыктарынан 2 жаран каза болгон.
Ушул күндөрү башкармалыктын райондук жана шаардык өзгөчө кырдаалдар бөлүмдөрүнүн өздүк курамы тарабынан өрт кырсыктарынын алдын алуу максатында кеңири түшүндүрүү иштери жүргүзүлүп жатат. Тагырагы, адистер тарабынан 14166 турак жай камтылып, 24830 жаранга өрт коопсуздугу боюнча маалыматтар жеткирилди. Ар бир турак жай ээлерине өрт кырсыгынын алдын алуу, коопсуздук эрежелерин сактоо жана өрт кырсыгы катталган учурда 101 жана 112 байланыш номерлерине кайрылуу зарылдыгы эскертилди», - деп айтылат мекемеде.